באַניץ־תּנאָים

די דאָזיקע כּללים זענען באַשטעטיקט געוואָרן דורך דעם פֿאַרוואַלטונגס־ראַט פֿון דער וויקימעדיע־פֿונדאַציע. באַאַמטע אָדער אָנגעשטעלטע פֿון דער וויקימעדיע־פֿונדאַציע טאָרן די דאָזיקע כּללים נישט אַרומגיין, אָפּשוואַכן אָדער איגנאָרירן. דאָס זעלבע גילט פֿאַר די אָרטיקע כּללים פֿון יעדן וויקימעדיע־פּראָיעקט. נא לשים לב לכך שבמקרה של הבדל במשמעות או בפרשנות בין הגרסה המקורית האנגלית של התנאים האלה לבין התרגום, הגרסה האנגלית המקורית קובעת.

באַניץ־תּנאָים פֿון דער וויקימעדיע־פֿונדאַציע דאָס איז אַ קיצור פֿון די באַניץ־תּנאָים. כּדי צו לייענען די פֿולע תּנאָים, מעגילט אַראָפּ אָדער דריקט דאָ. דאָס איז אַ לײַכט פֿאַרשטענדלעכער קיצור פֿון די באַניץ־תּנאָים. קלאָרשטעלונג: דער דאָזיקער קיצור איז נישט קיין טייל פֿון די באַניץ־תּנאָים און איז נישט קיין לעגאַלער דאָקומענט. ער איז נאָר אַ באַקוועמע הילף צו פֿאַרשטיין די פֿולע תּנאָים. באַטראַכט אים ווי אַ באַניצער־פֿרײַנדלעכן צובינד צו דער לעגאַלער שפּראַך פֿון אונדזערע באַניץ־תּנאָים. אַ טייל פֿון אונדזער מיסיע איז: צו געבן די מעגלעכקייט און דעם אָנטרײַב צו מענטשן איבער דער וועלט צו זאַמלען און אַנטוויקלען בילדונגס־אינהאַלט, און אים פֿאַרעפֿנטלעכן אונטער אַ פֿרײַער ליצענץ אָדער איבערגעבן אינעם עפֿנטלעכן אייגנטום. צו פֿאַרשפּרייטן דעם אינהאַלט עפֿעקטיוו איבער דער וועלט, פֿרײַ פֿון אָפּצאָל. צו צושטעלן וועבזײַטן און טעכנישע אינפֿראַסטרוקטור כּדי אײַך צו העלפֿן דאָס צו טאָן. איר קענט פֿרײַ: לייענען און דרוקן אונדזערע אַרטיקלען און אַנדערע מעדיע פֿרײַ פֿון אָפּצאָל. מיטטיילן און ווידערניצן אונדזערע אַרטיקלען און אַנדערע מעדיע אונטער פֿרײַע און אָפֿענע ליצענצן. בײַטראָגן צו און רעדאַקטירן אונדזערע פֿאַרשיידענע וועבזײַטן אָדער פּראָיעקטן. אונטער די פֿאָלגנדיקע תּנאָים: פֿאַראַנטוואָרטלעכקייט — איר נעמט פֿאַראַנטוואָרטלעכקייט פֿאַר אײַערע רעדאַקטירונגען (ווײַל מיר בלויז באַלעבאַטעווען אײַער אינהאַלט). דרך־ארץ — איר שטיצט אַ דרך־ארצדיקע סבֿיבֿה און באַלעסטיקט נישט אַנדערע באַניצערס. געזעצלעכער אויפֿפֿיר — איר פֿאַרלעצט נישט אויטאָררעכט, פֿאַרעפֿנטלעכט נישט אומגעזעצלעכן אינהאַלט און פֿאַרלעצט נישט אַנדערע אָנווענדלעכע געזעצן וואָס פֿאָלגן מענטשנרעכט־פּרינציפּן. נישט שאַטן — איר שאַט נישט אונדזער טעכנאָלאָגישער אינפֿראַסטרוקטור און פֿאָלגט די פּאָליטיקן פֿאַר דער אינפֿראַסטרוקטור. באַניץ־תּנאָים און פּאָליטיקן — איר האַלט זיך בײַ די ווײַטערדיקע באַניץ־תּנאָים, בײַם אוניווערסאַלן אויפֿפֿירונג־קאָדעקס און בײַ די אָנווענדלעכע קהילה־פּאָליטיקן ווען איר באַזוכט אונדזערע וועבזײַטן אָדער פּראָיעקטן אָדער באַטייליקט זיך אין אונדזערע קהילות. מיטן פֿאַרשטאַנד אַז: איר ליצענצירט אײַערע בײַטראָגן פֿרײַ — בכלל מוזט איר ליצענצירן אײַערע בײַטראָגן און רעדאַקטירונגען צו אונדזערע וועבזײַטן אָדער פּראָיעקטן אונטער אַ פֿרײַער און אָפֿענער ליצענץ (סײַדן אײַער בײַטראָג איז אינעם עפֿנטלעכן אייגנטום). קיין פּראָפֿעסיאָנעלע עצה — דער אינהאַלט פֿון אַרטיקלען אויף וויקיפּעדיע און אַנדערע פּראָיעקטן איז נאָר פֿאַר אינפֿאָרמאַציע־צוועקן און איז נישט קיין פּראָפֿעסיאָנעלע עצה. אויב איר דאַרפֿט הילף אָדער ווילט מעלדן אַ פֿאַרלעצונג פֿון די דאָזיקע באַניץ־תּנאָים, קענט איר: בעטן הילף אויף אונדזערע פּראָיעקטן: דריקט אויף „הילף“ אויף דער לינקער זײַט פֿון רובֿ זײַטן. בעטן הילף דורך בליצפּאָסט: פֿאַרבינדט זיך מיט דערפֿאַרענע פֿרײַוויליקע פֿאַר הילף דורך שיקן אַ בליצבריוו צו infowikimediaorg. זיך פֿאַרבינדן מיט דער וויקימעדיע־פֿונדאַציע: אינפֿאָרמאַציע וועגן ווי זיך צו פֿאַרבינדן מיט אונדז געפֿינט זיך אויף אונדזער פֿאַרבינדונג־זײַט. אויב איר זײַט אַ נײַער בײַשטײַערער: אויף זײַטן ווי דער אַרײַנפֿיר פֿאַר נײַ־געקומענע קענט איר געפֿינען פּראָיעקט־פּאָליטיקן וואָס העלפֿן לערנען ווי צו נוצן די וויקימעדיע־פּראָיעקטן.

אונדזערע באַניץ־תּנאָים

שטעלט זיך פֿאָר אַ וועלט אין וועלכער יעדער מענטש קען פֿרײַ האָבן אַ טייל אין דער גאַנצער סומע פֿון וויסן. דאָס איז אונדזער פֿאַרפֿליכטונג. – אונדזער וויזיע־דערקלערונג

ברוכים־הבאים צו וויקימעדיע! די וויקימעדיע־פֿונדאַציע, אינק. („מיר“, „אונדז“ אָדער „פֿונדאַציע“), איז אַ נישט־פֿאַר־פּראָפֿיט צדקה־אָרגאַניזאַציע מיט איר הויפּטזיץ אין סאַן־פֿראַנסיסקאָ, קאַליפֿאָרניע, פֿאַראייניקטע שטאַטן. איר מיסיע איז צו געבן מענטשן איבער דער וועלט די מעגלעכקייט און דעם אָנטרײַב צו זאַמלען און אַנטוויקלען אינהאַלט אונטער אַ פֿרײַער ליצענץ אָדער אינעם עפֿנטלעכן אייגנטום, און אים עפֿעקטיוו צו פֿאַרשפּרייטן איבער דער וועלט, פֿרײַ פֿון אָפּצאָל.

כּדי צו שטיצן אונדזער לעבעדיקע קהילה, צושטעלן מיר די נייטיקע אינפֿראַסטרוקטור און דעם אָרגאַניזאַציע־ראַם פֿאַר דער אַנטוויקלונג פֿון פֿילשפּראַכיקע וויקי־פּראָיעקטן און זייערע אויסגאַבעס (ווי דערקלערט אויף אונדזער זײַט וועגן די וויקימעדיע־פּראָיעקטן) (ווײַטער אָנגערופֿן „פּראָיעקטן“), און אַנדערע אונטערנעמונגען וואָס דינען דער דאָזיקער מיסיע. מיר שטרעבן צו מאַכן און האַלטן דעם בילדונגס־ און אינפֿאָרמאַציע־אינהאַלט פֿון די פּראָיעקטן צוטריטלעך אויפֿן אינטערנעץ פֿרײַ פֿון אָפּצאָל, אויף אייביק.

מיר באַגריסן אײַך („איר“ אָדער דער „באַניצער“) ווי אַ לייענער אָדער בײַשטײַערער צו די פּראָיעקטן, און דערמוטיקן אײַך זיך אָנצושליסן אין דער וויקימעדיע־קהילה. איידער איר באַטייליקט זיך, בעטן מיר אָבער אַז איר זאָלט לייענען און מסכּים זײַן מיט די פֿאָלגנדיקע באַניץ־תּנאָים („באַניץ־תּנאָים“).

די דאָזיקע באַניץ־תּנאָים דערקלערן אײַך אונדזערע עפֿנטלעכע סערוויסעס בײַ דער וויקימעדיע־פֿונדאַציע, אונדזער באַציִונג צו אײַך ווי אַ באַניצער, און די רעכט און פֿאַראַנטוואָרטלעכקייטן וואָס פֿירן אונדז ביידן. מיר באַלעבאַטעווען אַן אויסערגעוויינטלעך גרויסע מאָס בילדונגס־ און אינפֿאָרמאַציע־אינהאַלט, וואָס ווערט אין גאַנצן בײַגעטראָגן און דערמעגלעכט דורך באַניצערס ווי איר. בכלל טראָגן מיר נישט בײַ, קאָנטראָלירן נישט און מעקן נישט אויס אינהאַלט (מיט זעלטענע אויסנאַמען, ווי לויט פּאָליטיקן אַזעלכע ווי די דאָזיקע באַניץ־תּנאָים, כּדי זיך צו האַלטן בײַם געזעץ, אָדער בײַ דרינגענדיקע דראָונגען פֿון ערנסטן שאָדן). דאָס מיינט אַז די רעדאַקטאָרישע קאָנטראָל איז אין די הענט פֿון אײַך און אײַערע מיטבאַניצערס, וואָס שאַפֿן און פֿאַרוואַלטן דעם אינהאַלט.

די קהילה — די נעץ פֿון באַניצערס וואָס בויען און ניצן כּסדר די פּראָיעקטן און/אָדער זייערע וועבזײַטן (ווײַטער אָנגערופֿן „פּראָיעקט־וועבזײַטן“) — איז דער הויפּטמיטל דורך וועלכן די צילן פֿון דער מיסיע ווערן דערגרייכט. די קהילה טראָגט בײַ צו אונדזערע פּראָיעקטן און פּראָיעקט־וועבזײַטן און העלפֿט זיי אָנפֿירן. די קהילה נעמט אויך אויף זיך די קריטישע אויפֿגאַבע פֿון שאַפֿן און דורכפֿירן פּאָליטיקן פֿאַר די באַזונדערע פּראָיעקט־אויסגאַבעס (ווי די פֿאַרשיידענע שפּראַך־אויסגאַבעס פֿונעם וויקיפּעדיע־פּראָיעקט אָדער די פֿילשפּראַכיקע אויסגאַבע פֿון וויקימעדיע־קאָמאָנס).

איר, דער באַניצער, זײַט באַגריסט זיך אָנצושליסן ווי אַ בײַשטײַערער, רעדאַקטאָר אָדער מחבר. איר זאָלט אָבער פֿאָלגן די פּאָליטיקן וואָס גילטן פֿאַר יעדער אומאָפּהענגיקער פּראָיעקט־אויסגאַבע, אַרײַנגערעכנט דעם אוניווערסאַלן אויפֿפֿירונג־קאָדעקס (UCoC), וואָס גילט פֿאַר אַלע פּראָיעקט־אויסגאַבעס. דער גרעסטער פֿון אונדזערע פּראָיעקטן איז וויקיפּעדיע, אָבער מיר באַלעבאַטעווען אויך אַנדערע פּראָיעקטן, יעדן מיט אייגענע צילן און אַרבעט־מעטאָדן. יעדע פּראָיעקט־אויסגאַבע האָט אַ מאַנשאַפֿט פֿון בײַשטײַערער, רעדאַקטאָרן אָדער מחברים וואָס אַרבעטן צוזאַמען צו שאַפֿן און פֿאַרוואַלטן דעם אינהאַלט פֿון דער אויסגאַבע. איר זײַט באַגריסט זיך אָנצושליסן אין די מאַנשאַפֿטן און מיט זיי צו אַרבעטן צו פֿאַרבעסערן די פּראָיעקטן. ווײַל מיר זענען געטרײַ דעם ציל פֿון מאַכן אינהאַלט פֿרײַ צוטריטלעך פֿאַרן עולם, ווערט דער אינהאַלט וואָס איר טראָגט בײַ צוגעשטעלט אונטער אַ פֿרײַער ליצענץ אָדער באַפֿרײַט אינעם עפֿנטלעכן אייגנטום.

ביטע נעמט אין אַכט אַז איר זײַט לעגאַל פֿאַראַנטוואָרטלעך פֿאַר אַלע אײַערע בײַטראָגן, רעדאַקטירונגען און ווידערבאַניץ פֿון וויקימעדיע־אינהאַלט לויט די געזעצן פֿון די פֿאַראייניקטע שטאַטן פֿון אַמעריקע און אַנדערע אָנווענדלעכע געזעצן (וואָס קענען אַרײַננעמען די געזעצן פֿון דעם אָרט וווּ איר אָדער דער סוביעקט פֿון אײַערע בײַטראָגן געפֿינט זיך). דערפֿאַר איז וויכטיק אַז איר זאָלט זײַן פֿאָרזיכטיק בײַם פֿאַרעפֿנטלעכן, ענדערן אָדער ווידערניצן אינהאַלט. צוליב דער דאָזיקער פֿאַראַנטוואָרטלעכקייט האָבן מיר געוויסע כּללים וועגן וואָס איר טאָר נישט טאָן. רובֿ פֿון זיי זענען באַשטימט צו באַשיצן אײַך אָדער אַנדערע באַניצערס ווי איר. ביטע געדענקט אַז דער אינהאַלט וואָס מיר באַלעבאַטעווען איז נאָר פֿאַר אַלגעמיינע אינפֿאָרמאַציע־צוועקן. אויב איר דאַרפֿט אַן עצה פֿון אַ מומחה וועגן אַ באַזונדערער פֿראַגע (ווי מעדיצינישע, לעגאַלע אָדער פֿינאַנציעלע ענינים), זאָלט איר זוכן די הילף פֿון אַ פּאַסיקן פֿאַכמאַן. מיר נעמען אויך אַרײַן אַנדערע וויכטיקע מעלדונגען און קלאָרשטעלונגען וועגן פֿאַראַנטוואָרטלעכקייט, דערפֿאַר ביטע לייענט די דאָזיקע באַניץ־תּנאָים אין גאַנצן.

כּדי צו זײַן קלאָר: אַנדערע אָרגאַניזאַציעס, ווי לאָקאַלע וויקימעדיע־אָפּטיילן און פֿאַראיינען, וואָס קענען טיילן די זעלבע מיסיע, זענען פֿאָרט לעגאַל אומאָפּהענגיק און באַזונדער פֿון דער וויקימעדיע־פֿונדאַציע. סײַדן די פֿונדאַציע האָט באַשטימט אַנדערש וועגן אַ באַפֿוגטן צד אויף דער וועבזײַט פֿון אַ געוויסן פּראָיעקט, טראָגן די אַנדערע אָרגאַניזאַציעס נישט קיין פֿאַראַנטוואָרטלעכקייט פֿאַרן פֿונקציאָנירן פֿון דער פּראָיעקט־וועבזײַט אָדער פֿאַר איר אינהאַלט.

די וויקימעדיע־פֿונדאַציע איז געווידמעט צו דערמוטיקן דעם וווּקס, די אַנטוויקלונג און די פֿאַרשפּרייטונג פֿון פֿרײַעם פֿילשפּראַכיקן אינהאַלט, און צו באַלעבאַטעווען דעם גאַנצן אינהאַלט פֿון די דאָזיקע וויקי־באַזירטע פּראָיעקטן פֿאַרן עולם פֿרײַ פֿון אָפּצאָל. אונדזער תּפקיד איז צו באַלעבאַטעווען עטלעכע פֿון די גרעסטע געמיינזאַם רעדאַקטירטע רעפֿערענץ־פּראָיעקטן אויף דער וועלט, וואָס געפֿינען זיך דאָ. מיר האַנדלען אָבער נאָר ווי אַ באַלעבאַטעווען־סערוויס־צושטעלער, וואָס האַלט אויף די אינפֿראַסטרוקטור און דעם אָרגאַניזאַציע־ראַם. די אינפֿראַסטרוקטור און דער ראַם דערמעגלעכן אונדזערע באַניצערס צו בויען די פּראָיעקטן דורך אַליין בײַטראָגן און רעדאַקטירן אינהאַלט. זיי דערמעגלעכן אויך אונדזערע באַניצערס צו ווידערניצן דעם אינהאַלט. די אינפֿראַסטרוקטור וואָס מיר האַלטן אויף נעמט אַרײַן ספּעציאַליזירטע טעכנאָלאָגישע אינפֿראַסטרוקטור, וואָס דערמעגלעכט באַניצערס פּראָגראַמאַטיש צו אַרבעטן מיטן אינהאַלט אויף די פּראָיעקטן און אים ווידערצוניצן (באַצייכנט ווי „אַפּליקאַציע־פּראָגראַמיר־צובינד“ אָדער „API“), און מאָבילע אַפּליקאַציעס.

אין די ווײַטערדיקע באַניץ־תּנאָים באַשטייען אונדזערע סערוויסעס פֿון: די פּראָיעקט־וועבזײַטן וואָס מיר באַלעבאַטעווען, טעכנאָלאָגישער אינפֿראַסטרוקטור וואָס מיר האַלטן אויף, און סײַ וועלכע טעכנישע רוימען וואָס מיר באַלעבאַטעווען כּדי אויפֿצוהאַלטן און פֿאַרבעסערן אונדזערע פּראָיעקטן.

צוליב אונדזער באַזונדערן תּפקיד זענען דאָ עטלעכע זאַכן וואָס איר זאָלט וויסן בײַם באַטראַכטן אונדזער באַציִונג צו אײַך, די פּראָיעקטן און אַנדערע באַניצערס:

1. מיר נעמען נישט אויף זיך קיין רעדאַקטאָרישן תּפקיד: ווײַל די פּראָיעקטן ווערן רעדאַקטירט אין צוזאַמענאַרבעט, ווערט דער ווײַט גרעסטער טייל פֿון דעם אינהאַלט וואָס מיר באַלעבאַטעווען צוגעשטעלט פֿון באַניצערס, און מיר נעמען נישט אויף זיך קיין רעדאַקטאָרישן תּפקיד. דאָס מיינט אַז מיר קאָנטראָלירן אָדער רעדאַקטירן בכלל נישט דעם אינהאַלט פֿון די פּראָיעקט־וועבזײַטן, און מיר נעמען נישט אויף זיך קיין פֿאַראַנטוואָרטלעכקייט פֿאַר דעם אינהאַלט. אַזוי אויך, סײַדן מיר האָבן בפֿירוש באַשטימט אַנדערש, שטיצן מיר נישט קיין מיינונגען אויסגעדריקט דורך אונדזערע סערוויסעס, און מיר דערקלערן אָדער גאַראַנטירן נישט די אמתקייט, גענויקייט אָדער פֿאַרלאָזלעכקייט פֿון סײַ וועלכן קהילה־אינהאַלט אַרײַנגעגעבן אויף די פּראָיעקטן.
2. איר זײַט פֿאַראַנטוואָרטלעך פֿאַר אײַערע אייגענע אַקציעס: איר זײַט לעגאַל פֿאַראַנטוואָרטלעך פֿאַר אײַערע רעדאַקטירונגען און בײַטראָגן אויף די פּראָיעקטן, אײַער ווידערבאַניץ פֿון אינהאַלט אויף די פּראָיעקטן, אײַער באַניץ פֿון די API־צובינדן און אײַער באַניץ פֿון אונדזערע סערוויסעס בכלל. פֿאַר אײַער אייגענעם שוץ זאָלט איר זײַן פֿאָרזיכטיק און זיך אָפּהאַלטן פֿון אַקציעס וואָס קענען פֿירן צו קרימינעלער אָדער ציווילער פֿאַראַנטוואָרטלעכקייט לויט סײַ וועלכע אָנווענדלעכע געזעצן. כּדי צו זײַן קלאָר: דאָס אָנווענדלעכע געזעץ נעמט אַרײַן כאָטש די געזעצן פֿון די פֿאַראייניקטע שטאַטן פֿון אַמעריקע און פֿונעם שטאַט קאַליפֿאָרניע. פֿאַר אַנדערע לענדער ווערט דאָס באַשטימט פֿאַר יעדן פֿאַל באַזונדער. כאָטש מיר קענען זײַן נישט מסכּים מיט אַזעלכע אַקציעס, וואָרענען מיר באַניצערס — בפֿרט רעדאַקטאָרן, בײַשטײַערער און מחברים — אַז אויטאָריטעטן אויסער די פֿאַראייניקטע שטאַטן קענען פּרוּוון אָנווענדן אויף אײַך געזעצן פֿון אַנדערע לענדער, אַרײַנגערעכנט לאָקאַלע געזעצן דאָרטן וווּ איר וווינט אָדער וווּ איר קוקט אויף אָדער רעדאַקטירט אינהאַלט. בכלל קענען מיר נישט צושטעלן קיין שוץ, גאַראַנטיע, אימוניטעט אָדער שיפּוי קעגן דער אָנווענדונג פֿון אַזעלכע געזעצן.

מיר בעטן אײַך איבערצולייענען די תּנאָים פֿון אונדזער פּריוואַטקייט־פּאָליטיק, כּדי איר זאָלט וויסן ווי מיר זאַמלען און ניצן אײַער אינפֿאָרמאַציע.

1. געוויסע מאַטעריאַלן קענען אײַך אויסזען אומאָננעמלעך אָדער פֿאַלש: ווײַל מיר באַלעבאַטעווען אַ ברייטע אויסוואַל אינהאַלט געשאַפֿן אָדער געזאַמלט פֿון מיטבאַניצערס, קענט איר טרעפֿן מאַטעריאַלן וואָס איר האַלט פֿאַר באַליידיקנדיק, פֿאַלש, פֿאַרפֿירעריש, נישט ריכטיק באַצייכנט אָדער אַנדערש אומאָננעמלעך. דערפֿאַר בעטן מיר אַז איר זאָלט נוצן געזונטן שׂכל און אַ פּאַסיקן שיקול־דעת בײַם נוצן אונדזערע סערוויסעס.
2. דער אינהאַלט פֿון די פּראָיעקטן איז נאָר פֿאַר אַלגעמיינע אינפֿאָרמאַציע־צוועקן: כאָטש אונדזערע פּראָיעקטן באַלעבאַטעווען אַ סך אינפֿאָרמאַציע וועגן פּראָפֿעסיאָנעלע טעמעס, אַרײַנגערעכנט מעדיצינישע, לעגאַלע אָדער פֿינאַנציעלע ענינים, ווערט דער אינהאַלט פֿאָרגעשטעלט נאָר פֿאַר אַלגעמיינע אינפֿאָרמאַציע־צוועקן. מע זאָל אים נישט באַטראַכטן ווי אַ פּראָפֿעסיאָנעלע עצה. ביטע זוכט אומאָפּהענגיקע פּראָפֿעסיאָנעלע עצות בײַ עמעצן וואָס איז ליצענצירט אָדער קוואַליפֿיצירט אינעם באַטרעפֿנדיקן געביט, אַנשטאָט צו האַנדלען לויט סײַ וועלכער אינפֿאָרמאַציע, מיינונג אָדער עצה אין איינע פֿון די פּראָיעקט־וועבזײַטן.

די פּראָיעקטן וואָס די וויקימעדיע־פֿונדאַציע באַלעבאַטעוועט עקזיסטירן נאָר אַ דאַנק דער לעבעדיקער קהילה פֿון באַניצערס ווי איר, וואָס אַרבעטן צוזאַמען צו שרײַבן, רעדאַקטירן און צונויפֿשטעלן דעם אינהאַלט. מיר באַגריסן מיט פֿרייד אײַער אָנטייל אין דער דאָזיקער קהילה. מיר דערמוטיקן אײַך צו זײַן העפֿלעך און דרך־ארצדיק אין אײַערע באַציִונגען מיט אַנדערע אין דער קהילה, צו האַנדלען מיט גוטע כּוונות און צו מאַכן רעדאַקטירונגען און בײַטראָגן וואָס צילן צו פֿאָרויסברענגען די מיסיע פֿונעם געמיינזאַמען פּראָיעקט. מיר בעטן אַז אַלע באַניצערס זאָלן איבערלייענען און פֿאָלגן דעם אוניווערסאַלן אויפֿפֿירונג־קאָדעקס („UCoC“), וואָס באַשטימט פֿאָדערונגען פֿאַר קאָלעגיאַלער און דרך־ארצדיקער צוזאַמענאַרבעט איבער אַלע פּראָיעקטן וואָס מיר באַלעבאַטעווען.

געוויסע אַקטיוויטעטן, צי זיי זענען געזעצלעך צי אומגעזעצלעך לויטן אָנווענדלעכן געזעץ, קענען שאַטן אַנדערע באַניצערס און פֿאַרלעצן אונדזערע כּללים, און געוויסע אַקטיוויטעטן קענען אײַך אויך מאַכן לעגאַל פֿאַראַנטוואָרטלעך. דערפֿאַר, פֿאַר אײַער אייגענעם שוץ און דעם שוץ פֿון אַנדערע באַניצערס, טאָר איר נישט דורכפֿירן אַזעלכע אַקטיוויטעטן אויף אונדזערע פּראָיעקטן אָדער אויף אַן אַנדערן אופֿן ניצנדיק זיי. די אַקטיוויטעטן נעמען אַרײַן:

באַלעסטיקן און זידלען אַנדערע

• דורכפֿירן דראָונגען, נאָכיאָגן, ספּאַמען, וואַנדאַליזם אָדער באַלעסטיקונג ווי באַשריבן אינעם UCoC;
• שיקן קייטן־בריוו, אומגעוווּנטשענע בריוו אָדער ספּאַם צו אַנדערע באַניצערס;
• פֿאַרעפֿנטלעכן אָדער ענדערן אינהאַלט מיט דער כּוונה ערנסט צו שאַטן אַנדערע, ווי בכּיוון אָנרייצן צו זיך אַליין שאַטן, אָדער בכּיוון אַרויסרופֿן עפּילעפּטישע אָנפֿאַלן.

פֿאַרלעצן די פּריוואַטקייט פֿון אַנדערע

• פֿאַרלעצן די פּריוואַטקייט־רעכט פֿון אַנדערע לויט אָנווענדלעכע געזעצן (וואָס קענען אַרײַננעמען די געזעצן פֿון דעם אָרט וווּ איר וווינט אָדער וווּ איר קוקט אויף אָדער רעדאַקטירט אינהאַלט);
• בעטן פּערזענלעך אידענטיפֿיצירנדיקע אינפֿאָרמאַציע פֿאַר באַלעסטיקונג, אויסניצונג אָדער פֿאַרלעצן פּריוואַטקייט, אָדער פֿאַר סײַ וועלכן רעקלאַמע־ אָדער געשעפֿטלעכן צוועק וואָס די וויקימעדיע־פֿונדאַציע האָט נישט בפֿירוש באַשטעטיקט; און
• בעטן פּערזענלעך אידענטיפֿיצירנדיקע אינפֿאָרמאַציע פֿון עמעצן אונטער 18 יאָר, אָדער אונטער דער דערוואַקסנקייט־עלטער אין אײַער אָרט אויב זי איז העכער פֿון 18 יאָר, פֿאַר אַן אומגעזעצלעכן צוועק, אָדער פֿאַרלעצן סײַ וועלכן אָנווענדלעכן געזעץ וועגן דער געזונט אָדער וווילזײַן פֿון מינדעריאָריקע.

מאַכן פֿאַלשע דערקלערונגען, זיך אויסגעבן פֿאַר אַן אַנדערן אָדער דורכפֿירן שווינדל

• בכּיוון אָדער וויסנדיק פֿאַרעפֿנטלעכן אינהאַלט וואָס איז אַ פֿאַרלוימדונג לויט די געזעצן פֿון די פֿאַראייניקטע שטאַטן פֿון אַמעריקע;
• פֿאַרעפֿנטלעכן אָדער ענדערן אינהאַלט מיט דער כּוונה צו נאַרן אָדער פֿאַרפֿירן אַנדערע;
• פּרוּוון זיך אויסצוגעבן פֿאַר אַן אַנדער באַניצער אָדער מענטש, פֿאַלש פֿאָרשטעלן אײַער פֿאַרבינדונג מיט סײַ וועלכן מענטש אָדער גוף, באַהאַלטן אײַער פֿאַרבינדונג מיט סײַ וועלכן מענטש אָדער גוף ווען די דאָזיקע תּנאָים אָדער אַ לאָקאַלע פּראָיעקט־פּאָליטיק פֿאָדערן אַנטפּלעקונג, אָדער נוצן דעם נאָמען אָדער באַניצער־נאָמען פֿון אַן אַנדער מענטש מיט דער כּוונה צו נאַרן; און
• דורכפֿירן שווינדל.

פֿאַרלעצן אינטעלעקטועלע אייגנטום־רעכט

• פֿאַרלעצן אויטאָררעכט, האַנדלסמאַרקן, פּאַטענטן אָדער אַנדערע אייגנטום־רעכט לויטן אָנווענדלעכן געזעץ.

מיסברויכן אונדזערע סערוויסעס פֿאַר אַנדערע אומגעזעצלעכע צוועקן

• פֿאַרעפֿנטלעכן קינדער־פּאָרנאָגראַפֿיע אָדער סײַ וועלכן אַנדער אינהאַלט וואָס פֿאַרלעצט דאָס אָנווענדלעכע געזעץ וועגן קינדער־פּאָרנאָגראַפֿיע אָדער מאַטעריאַלן פֿון סעקסועלן מיסברויך פֿון קינדער, אָדער דערמוטיקן, מאַניפּולירן אָדער אָנרופֿן אַנדערע צו שאַפֿן אָדער מיטטיילן אַזעלכע מאַטעריאַלן;
• פֿאַרעפֿנטלעכן אָדער האַנדלען מיט גראָבע סעקסועלע מאַטעריאַלן (obscene material) וואָס זענען אומגעזעצלעך לויטן אָנווענדלעכן געזעץ; און
• נוצן די סערוויסעס אויף אַן אופֿן וואָס איז נישט אין איינקלאַנג מיטן אָנווענדלעכן געזעץ.

שטערנדיקער און אומגעזעצלעכער מיסברויך פֿון די סיסטעמען

• פֿאַרעפֿנטלעכן אָדער פֿאַרשפּרייטן אינהאַלט וואָס אַנטהאַלט ווירוסן, שאָדנס־ווייכוואַרג, וואָרעמס, טראָיאַנישע פֿערד, בייזוויליקן קאָד אָדער סײַ וועלכן אַנדער מיטל וואָס קען שאַטן אונדזער טעכנישער אינפֿראַסטרוקטור אָדער סיסטעם, אָדער יענעם פֿון אַנדערע באַניצערס;
• אויטאָמאַטיזירט נוצן די פּראָיעקט־וועבזײַטן אויף אַן אופֿן וואָס מיסברויכט אָדער שטערט די סערוויסעס, פֿאַרלעצט פּאָליטיקן וועגן דערלויבטן באַניץ וווּ אַזעלכע עקזיסטירן, אָדער איז נישט באַשטעטיקט פֿון דער וויקימעדיע־קהילה;
• שטערן די סערוויסעס דורך לייגן אַן איבערמעסיקע לאַסט אויף אַן API־צובינד, אַ פּראָיעקט־וועבזײַט אָדער די נעצן אָדער סערווערס פֿאַרבונדן מיט אַ באַזונדערער פּראָיעקט־וועבזײַט;
• שטערן די סערוויסעס דורך פֿאַרפֿלייצן וועלכע עס איז פּראָיעקט־וועבזײַט מיט קאָמוניקאַציעס אָדער אַנדער דאַטן־פֿאַרקער וואָס ווײַזט נישט אויף אַן ערנסטער כּוונה צו נוצן די פּראָיעקט־וועבזײַט פֿאַר איר דערקלערטן צוועק;
• וויסנדיק באַקומען צוטריט צו, זיך אַרײַנמישן אין אָדער נוצן סײַ וועלכע נישט עפֿנטלעכע געביטן אין אונדזערע קאָמפּיוטער־סיסטעמען אָן דערלויבעניש; און
• אויספֿאָרשן, סקאַנירן אָדער אויספּרוּוון די שוואַכקייטן פֿון סײַ וועלכע אונדזערע טעכנישע סיסטעמען אָדער נעצן, סײַדן אַלע פֿאָלגנדיקע תּנאָים ווערן מקוים:

• די אַקציעס מיסברויכן אָדער שטערן נישט איבער דער מאָס אונדזערע טעכנישע סיסטעמען אָדער נעצן;
• די אַקציעס ��ענען נישט פֿאַר פּערזענלעכן רווח (אַחוץ אַנערקענונג פֿאַר אײַער אַרבעט);
• איר מעלדט יעדע שוואַכקייט צו די באַטרעפֿנדיקע אַנטוויקלערס (אָדער פֿאַרריכט זי אַליין); און
• איר פֿירט נישט דורך אַזעלכע אַקציעס מיט אַ בייזוויליקער אָדער צעשטערערישער כּוונה.

באַצאָלטע בײַטראָגן אָן אַנטפּלעקונג

• איר מוזט אַנטפּלעקן יעדן באַלעבאָס, קליענט, בדעהדיקן בענעפֿיציאַר און פֿאַרבינדונג אין שײַכות מיט יעדן בײַטראָג פֿאַר וועלכן איר באַקומט אָדער דערוואַרט צו באַקומען אַ פֿאַרגיטיקונג. איר מוזט דאָס אַנטפּלעקן אויף כאָטש איינעם פֿון די פֿאָלגנדיקע אופֿנים:

• אַ דערקלערונג אויף אײַער באַניצער־זײַט,
• אַ דערקלערונג אויף דער שמועס־זײַט וואָס באַגלייט סײַ וועלכע באַצאָלטע בײַטראָגן, אָדער
• אַ דערקלערונג אינעם רעדאַקטיר־קיצור וואָס באַגלייט סײַ וועלכע באַצאָלטע בײַטראָגן.

• דערצו, אויב איר פֿאַרעפֿנטלעכט אויסער די פּראָיעקטן אַ מעלדונג וואָס רעקלאַמירט רעדאַקטיר־סערוויסעס אויף וויקיפּעדיע פֿאַר אַ פֿאַרגיטיקונג פֿון וועלכן עס איז סאָרט, מוזט איר אין דער עפֿנטלעכער מעלדונג אויפֿן דריט־צדדיקן סערוויס אַנטפּלעקן אַלע וויקיפּעדיע־קאָנטעס וואָס איר האָט געניצט אָדער וועט נוצן פֿאַר דעם סערוויס.
• דאָס אָנווענדלעכע געזעץ, פּראָיעקט־ספּעציפֿישע פּאָליטיקן, און די פּאָליטיקן און אנווײַזונגען פֿון דער פֿונדאַציע, ווי די וואָס באַהאַנדלען אינטערעסן־קאָנפֿליקטן, קענען נאָך ווײַטער באַגרענעצן באַצאָלטע בײַטראָגן אָדער פֿאָדערן אַ מער פּרטימדיקע אַנטפּלעקונג. למשל, פֿאַרלעצן די וויקימעדיע־האַנדלסמאַרקן (אונטן דעפֿינירט אין אָפּטייל 6) כּדי צו רעקלאַמירן באַצאָלטע רעדאַקטיר־סערוויסעס, באַזײַטיקן אַנטפּלעקונגען פֿון באַצאָלטע רעדאַקטירונגען וואָס זענען פֿריִער געהעריק אַנטפּלעקט געוואָרן, אָדער באַצאָלט רעדאַקטירן אָן אַרײַנשרײַבן זיך אויף אַן אופֿן וואָס מאַכט אַ געהעריקע אַנטפּלעקונג פּראַקטיש אוממעגלעך — דאָס אַלץ פֿאַרלעצט דעם דאָזיקן אָפּטייל.
• די קהילה פֿון אַ וויקימעדיע־פּראָיעקט קען אָננעמען אַן אַנדער פּאָליטיק וועגן אַנטפּלעקן באַצאָלטע בײַטראָגן, וואָס קען דערגאַנצן אָדער פֿאַרבײַטן דעם דאָזיקן אָפּטייל. אויב אַ פּראָיעקט נעמט אָן אַן אַנדער אַנטפּלעקונג־פּאָליטיק, מעגט איר בײַם בײַטראָגן צו יענעם באַזונדערן פּראָיעקט זיך האַלטן בײַ דער פּאָליטיק אַנשטאָט די פֿאָדערונגען אין דעם דאָזיקן אָפּטייל (מיטן קעפּל „באַצאָלטע בײַטראָגן אָן אַנטפּלעקונג“).

פֿאַר מער אינפֿאָרמאַציע לייענט אונדזערע אָפֿט געפֿרעגטע פֿראַגעס וועגן אַנטפּלעקן באַצאָלטע בײַטראָגן.

רעדאַקטירונגען אָן אַנטפּלעקונג פֿון באַניצערס וואָס באַקומען אַ פֿאַרגיטיקונג שאַפֿן אַן אומבאַרעכטיקטע לאַסט אויף פֿרײַוויליקע רעדאַקטאָרן וואָס פֿאָרשן אויס און פֿירן דורך קהילה־פּאָליטיקן. דערפֿאַר, פֿאַר פֿאַרלעצונגען פֿון דעם דאָזיקן אָפּטייל אין שײַכות מיט נישט אַנטפּלעקטער באַצאָלטער רעדאַקטירונג, זײַט איר מסכּים זיך אונטערצוגעבן אַ בינדנדיקן „Med-Arb“ („פֿאַרמיטלונג פֿאַר אַ מאַרקעטינג־פֿירמע“), ווי באַשריבן אין אָפּטייל 14 פֿון די דאָזיקע באַניץ־תּנאָים.

מיר רעזערווירן זיך דאָס רעכט צו נוצן אונדזער שיקול־דעת בײַם דורכפֿירן די הוראות פֿון אָפּטייל 4 פֿון די דאָזיקע באַניץ־תּנאָים. וווּ עס איז נייטיק, קען דאָס דורכפֿירן די תּנאָים אַרײַננעמען אַקציעס וואָס זענען נישט אויסגערעכנט אין דער פּאָליטיק וועגן אָפֿיציעלע אַקציעס פֿון דער וויקימעדיע־פֿונדאַציע. אויב דורכפֿירונג איז נייטיק אין נײַע אומשטענדן, וועלן מיר זיך באַמיִען אין העכסטנס איין (1) יאָר צו דערהײַנטיקן די פּאָליטיק וועגן אָפֿיציעלע אַקציעס כּדי צו קאַטאַלאָגירן דעם נײַעם סאָרט אַקציע.

איר זײַט פֿאַראַנטוואָרטלעך צו באַשיצן אײַער אייגענעם פּאַראָל און אַנדערע זיכערהייט־אידענטיפֿיקאַציע־פּרטים, און איר זאָלט זיי קיינמאָל נישט אַנטפּלעקן צו קיין דריטן צד.

כאָטש איר האָט ברייטע פֿרײַהייטן צו ווידערניצן דעם אינהאַלט אויף די פּראָיעקט־וועבזײַטן, איז וויכטיק אַז מיר בײַ דער וויקימעדיע־פֿונדאַציע זאָלן באַשיצן אונדזערע רעכט אויף האַנדלסמאַרקן, כּדי מיר זאָלן קענען באַשיצן אונדזערע באַניצערס קעגן שווינדלער וואָס געבן זיך אויס פֿאַר אַנדערע. דערפֿאַר בעטן מיר אײַך צו רעספּעקטירן אונדזערע האַנדלסמאַרקן. אַלע האַנדלסמאַרקן פֿון דער וויקימעדיע־פֿונדאַציע געהערן צו דער וויקימעדיע־פֿונדאַציע. יעדע באַניץ פֿון אונדזערע האַנדלסנעמען, האַנדלסמאַרקן, סערוויס־מאַרקן, לאָגאָס אָדער דאָמען־נעמען מוז זײַן אין איינקלאַנג מיט די דאָזיקע באַניץ־תּנאָים און מיט אונדזער האַנדלסמאַרקן־פּאָליטיק.

כּדי צו פֿאַרגרעסערן דעם געמיינזאַמען אוצר פֿון פֿרײַעם וויסן און פֿרײַער קולטור, מוזן אַלע באַניצערס וואָס טראָגן בײַ צו די פּראָיעקטן אָדער פּראָיעקט־וועבזײַטן געבן דעם ברייטן עולם ברייטע דערלויבענישן פֿרײַ צו פֿאַרשפּרייטן און ווידערניצן זייערע בײַטראָגן, בתּנאי אַז אַזאַ באַניץ גיט געהעריקן ייחוס און אַז די זעלבע פֿרײַהייט צו ווידערניצן און פֿאַרשפּרייטן ווערט געגעבן פֿאַר אַלע דעריוואַטיווע ווערק. אין איינקלאַנג מיט אונדזער ציל פֿון צושטעלן פֿרײַע אינפֿאָרמאַציע צום ברייטסטן מעגלעכן עולם, פֿאָדערן מיר אַז, ווען נייטיק, זאָל דער גאַנצער אַרײַנגעגעבענער אינהאַלט זײַן ליצענצירט אַזוי אַז יעדער וואָס האָט צוטריט צו אים קען אים פֿרײַ ווידערניצן.

איר זײַט מסכּים מיט די פֿאָלגנדיקע ליצענציר־פֿאָדערונגען:

1. טעקסט אויף וועלכן איר פֿאַרמאָגט די אויטאָררעכט: ווען איר גיט אַרײַן טעקסט אויף וועלכן איר פֿאַרמאָגט די אויטאָררעכט, זײַט איר מסכּים אים צו ליצענצירן אונטער:
   • דער Creative Commons צושרײַבונג־טיילן־גלײַך 4.0 אינטערנאַציאָנאַלער ליצענץ („CC BY-SA 4.0“), און
   • דער GNU־ליצענץ פֿאַר פֿרײַער דאָקומענטאַציע („GFDL“) (אָן אַ באַשטימטער ווערסיע, אָן אומענדערלעכע אָפּטיילן, טעקסטן פֿאַר דער פֿאָדערשטער הילע אָדער טעקסטן פֿאַר דער הינטערשטער הילע).
   ווידערבאַניצערס קענען זיך האַלטן בײַ איינע פֿון די צוויי ליצענצן אָדער בײַ ביידע. דער איינציקער אויסנאַם איז אויב די פּראָיעקט־אויסגאַבע אָדער פֿונקציע פֿאָדערט אַן אַנדער ליצענץ. אין אַזאַ פֿאַל זײַט איר מסכּים צו ליצענצירן יעדן טעקסט וואָס איר טראָגט בײַ אונטער דער באַזונדערער ליצענץ באַשטימט פֿון דער פּראָיעקט־אויסגאַבע אָדער פֿונקציע. ביטע נעמט אין אַכט אַז די דאָזיקע ליצענצן דערלויבן יאָ געשעפֿטלעכע באַניצן פֿון אײַערע בײַטראָגן, בתּנאי אַז די באַניצן פֿאָלגן די תּנאָים פֿון די באַטרעפֿנדיקע ליצענצן. וווּ איר פֿאַרמאָגט ספּעציעלע דאַטאַבאַזע־רעכט (Sui Generis Database Rights) וואָס ווערן געדעקט דורך CC BY-SA 4.0, פֿאַרזיכט איר אויף די דאָזיקע רעכט. למשל, דאָס מיינט אַז די פֿאַקטן וואָס איר טראָגט בײַ צו די פּראָיעקטן קענען פֿרײַ ווידערגעניצט ווערן אָן ייחוס.
2. ייחוס: ייחוס איז אַ וויכטיקער טייל פֿון די דאָזיקע ליצענצן. מיר באַטראַכטן עס ווי געבן אַנערקענונג צו די וואָס זי קומט זיי — מחברים ווי איר. ווען איר טראָגט בײַ טעקסט, זײַט איר מסכּים אַז מע זאָל אײַך געבן ייחוס אויף סײַ וועלכן פֿון די פֿאָלגנדיקע אופֿנים:
   1. דורך אַ היפּערלינק (וווּ מעגלעך) אָדער אַ URL־אַדרעס צום אַרטיקל צו וועלכן איר האָט בײַגעטראָגן (ווײַל יעדער אַרטיקל האָט אַ געשיכטע־זײַט וואָס רעכנט אויס אַלע בײַשטײַערער, מחברים און רעדאַקטאָרן);
   2. דורך אַ היפּערלינק (וווּ מעגלעך) אָדער אַ URL־אַדרעס צו אַן אַנדער, סטאַבילער אָנלײַן־קאָפּיע וואָס איז פֿרײַ צוטריטלעך, פֿאָלגט די באַטרעפֿנדיקע ליצענץ און גיט די מחברים אַנערקענונג אויף אַן אופֿן גלײַכווערטיק צו דער אַנערקענונג אויף דער פּראָיעקט־וועבזײַט; אָדער
   3. דורך אַ רשימה פֿון אַלע מחברים (אָבער ביטע נעמט אין אַכט אַז יעדע רשימה פֿון מחברים קען ווערן פֿילטרירט כּדי אויסצולאָזן זייער קליינע אָדער נישט באַטײַטיקע בײַטראָגן).
3. אימפּאָרטירן טעקסט: איר מעגט אימפּאָרטירן טעקסט וואָס איר האָט געפֿונען ערגעץ אַנדערש אָדער וואָס איר האָט מיט אַנדערע צוזאַמען פֿאַרפֿאַסט. אין אַזאַ פֿאַל דערקלערט און גאַראַנטירט איר אָבער אַז דער טעקסט איז צוטריטלעך אונטער תּנאָים וואָס זענען קאָמפּאַטיבל מיט CC BY-SA (אָדער, ווי אויבן דערקלערט, אַן אַנדער ליצענץ ווען די פּראָיעקט־אויסגאַבע אָדער פֿונקציע פֿאָדערט זי ווי אַן אויסנאַם). פֿאַר אַ רשימה פֿון קאָמפּאַטיבלע ליצענצן זעט Creative Commons. איר טאָר נישט אימפּאָרטירן אינהאַלט וואָס איז צוטריטלעך נאָר אונטער GFDL.
   איר זײַט מסכּים אַז, אויב איר אימפּאָרטירט טעקסט אונטער אַ CC־ליצענץ וואָס פֿאָדערט ייחוס, מוזט איר געבן דעם מחבר אָדער די מחברים אַנערקענונג אויף אַ פֿאַרנונפֿטיקן אופֿן. וווּ אַזאַ אַנערקענונג ווערט געוויינטלעך געגעבן דורך זײַט־געשיכטעס (ווי בײַ קאָפּירן אינעווייניק אין וויקימעדיע), איז גענוג צו געבן ייחוס בײַם אימפּאָרטירן דעם טעקסט אינעם רעדאַקטיר־קיצור, וואָס ווערט רעקאָרדירט אין דער זײַט־געשיכטע. די ייחוס־פֿאָדערונגען קענען אין געוויסע אומשטענדן זײַן צו אַרײַנדרינגלעך (אומאָפּהענגיק פֿון דער ליצענץ), און עס קענען זײַן פֿאַלן ווען די וויקימעדיע־קהילה באַשליסט אַז צוליב דעם קען מען נישט נוצן דעם אימפּאָרטירטן טעקסט.
4. נישט־טעקסטלעכע מעדיע: נישט־טעקסטלעכע מעדיע אויף די פּראָיעקטן זענען צוטריטלעך אונטער פֿאַרשיידענע ליצענצן, וואָס שטיצן דעם אַלגעמיינעם ציל פֿון דערלויבן אומבאַגרענעצטע ווידערבאַניץ און פֿאַרשפּרייטונג. ווען איר טראָגט בײַ נישט־טעקסטלעכע מעדיע, זײַט איר מסכּים צו פֿאָלגן די פֿאָדערונגען פֿאַר אַזעלכע ליצענצן ווי באַשריבן אין אונדזער ליצענציר־פּאָליטיק, און אויך די פֿאָדערונגען פֿון דער באַזונדערער פּראָיעקט־אויסגאַבע אָדער פֿונקציע צו וועלכער איר טראָגט בײַ. זעט אויך די ליצענציר־פּאָליטיק פֿון וויקימעדיע־קאָמאָנס פֿאַר מער אינפֿאָרמאַציע וועגן בײַטראָגן נישט־טעקסטלעכע מעדיע צו וויקימעדיע־קאָמאָנס.
5. קיין צוריקרופֿן פֿון דער ליצענץ: אַחוץ ווי דערלויבט לויט אײַער ליצענץ, זײַט איר מסכּים אַז איר וועט נישט איינזײַטיק צוריקרופֿן אָדער בעטן אומגילטיק צו מאַכן קיין ליצענץ וואָס איר האָט געגעבן לויט די דאָזיקע באַניץ־תּנאָים פֿאַר טעקסטלעכן אינהאַלט אָדער נישט־טעקסטלעכע מעדיע בײַגעטראָגן צו די פּראָיעקטן אָדער פֿונקציעס, אַפֿילו אויב איר הערט אויף צו נוצן אונדזערע סערוויסעס.
6. אינהאַלט אינעם עפֿנטלעכן אייגנטום: אינהאַלט אינעם עפֿנטלעכן אייגנטום איז באַגריסט. עס איז אָבער וויכטיק אַז איר זאָלט באַשטעטיקן דעם סטאַטוס פֿונעם אינהאַלט ווי עפֿנטלעכן אייגנטום לויטן געזעץ פֿון די פֿאַראייניקטע שטאַטן פֿון אַמעריקע און אויך לויט די געזעצן פֿון אַנדערע לענדער ווי געפֿאָדערט פֿון דער באַזונדערער פּראָיעקט־אויסגאַבע. ווען איר טראָגט בײַ אינהאַלט אינעם עפֿנטלעכן אייגנטום, גאַראַנטירט איר אַז דער מאַטעריאַל איז טאַקע אינעם עפֿנטלעכן אייגנטום, און איר זײַט מסכּים אים פּאַסיק צו באַצייכענען.
7. ווידערבאַניץ: ווידערניצן דעם אינהאַלט וואָס מיר באַלעבאַטעווען איז באַגריסט, כאָטש עס זענען דאָ אויסנאַמען פֿאַר אינהאַלט בײַגעטראָגן אונטער „יושרדיקן באַניץ“ (fair use) אָדער ענלעכע באַפֿרײַונגען לויטן אָנווענדלעכן אויטאָררעכט־געזעץ. יעדע ווידערבאַניץ מוז פֿאָלגן די ליצענץ אָדער ליצענצן וואָס גילטן פֿאַר דעם אינהאַלט.
   ווען איר ווידערניצט אָדער פֿאַרשפּרייט אַ טעקסט־זײַט אַנטוויקלט פֿון דער וויקימעדיע־קהילה, זײַט איר מסכּים צו געבן די מחברים ייחוס אויף סײַ וועלכן פֿון די פֿאָלגנדיקע אופֿנים:
   1. דורך אַ היפּערלינק (וווּ מעגלעך) אָדער אַ URL־אַדרעס צו דער זײַט אָדער די זײַטן וואָס איר ווידערניצט (ווײַל יעדע זײַט האָט אַ געשיכטע־זײַט וואָס רעכנט אויס אַלע בײַשטײַערער, מחברים און רעדאַקטאָרן);
   2. דורך אַ היפּערלינק (וווּ מעגלעך) אָדער אַ URL־אַדרעס צו אַן אַנדער, סטאַבילער אָנלײַן־קאָפּיע וואָס איז פֿרײַ צוטריטלעך, פֿאָלגט די ליצענץ און גיט די מחברים אַנערקענונג אויף אַן אופֿן גלײַכווערטיק צו דער אַנערקענונג אויף דער פּראָיעקט־וועבזײַט; אָדער
   3. דורך אַ רשימה פֿון אַלע מחברים (אָבער ביטע נעמט אין אַכט אַז יעדע רשימה פֿון מחברים קען ווערן פֿילטרירט כּדי אויסצולאָזן זייער קליינע אָדער נישט באַטײַטיקע בײַטראָגן).

   אויב דער טעקסטלעכער אינהאַלט איז אימפּאָרטירט געוואָרן פֿון אַן אַנדער מקור, קען זײַן אַז ער איז ליצענצירט אונטער אַ קאָמפּאַטיבלער CC BY-SA־ליצענץ, אָבער נישט אונטער GFDL (ווי אויבן באַשריבן אין „אימפּאָרטירן טעקסט“). אין אַזאַ פֿאַל זײַט איר מסכּים צו פֿאָלגן די קאָמפּאַטיבלע CC BY-SA־ליצענץ און האָט נישט די מעגלעכקייט אים צו רעליצענצירן אונטער GFDL. כּדי צו באַשטימען וועלכע ליצענץ גילט פֿאַר דעם אינהאַלט וואָס איר ווילט ווידערניצן אָדער פֿאַרשפּרייטן, זאָלט איר איבערקוקן דעם אונטערשטן טייל פֿון דער זײַט, די זײַט־געשיכטע און די דיסקוסיע־זײַט.

   דערצו, ביטע נעמט אין אַכט אַז טעקסט וואָס שטאַמט פֿון אויסערלעכע מקורים און איז אימפּאָרטירט געוואָרן אין אַ פּראָיעקט קען אונטערליגן אַ ליצענץ מיט נאָך ייחוס־פֿאָדערונגען. באַניצערס זענען מסכּים קלאָר אָנצוגעבן די נאָך ייחוס־פֿאָדערונגען. לויטן פּראָיעקט קענען די פֿאָדערונגען דערשײַנען, למשל, אין אַ באַנער אָדער אין אַנדערע באַמערקונגען וואָס ווײַזן אָן אַז אַ טייל אָדער דער גאַנצער אינהאַלט איז אָריגינעל פֿאַרעפֿנטלעכט געוואָרן ערגעץ אַנדערש. וווּ אַזעלכע זעעוודיקע באַמערקונגען זענען דאָ, זאָלן ווידערבאַניצערס זיי אויפֿהיטן.

   פֿאַר סײַ וועלכע נישט־טעקסטלעכע מעדיע זײַט איר מסכּים צו פֿאָלגן די אָנווענדלעכע ליצענץ אונטער וועלכער דאָס ווערק איז צוגעשטעלט געוואָרן (מע קען זי געפֿינען דורך דריקן אויפֿן ווערק און קוקן אינעם ליצענציר־אָפּטייל אויף זײַן באַשרײַבונג־זײַט, אָדער דורך איבערקוקן אַ באַטרעפֿנדיקע מקור־זײַט פֿאַר דעם ווערק). בײַם ווידערניצן סײַ וועלכן אינהאַלט וואָס מיר באַלעבאַטעווען, זײַט איר מסכּים צו פֿאָלגן די באַטרעפֿנדיקע ייחוס־פֿאָדערונגען לויט דער ליצענץ אָדער די ליצענצן וואָס גילטן פֿאַרן אינהאַלט.
8. ענדערונגען אָדער צוגאָבן צו מאַטעריאַל וואָס איר ווידערניצט: ווען איר ענדערט אָדער לייגט צו צו טעקסט וואָס איר האָט באַקומען פֿון אַ פּראָיעקט־וועבזײַט, זײַט איר מסכּים צו ליצענצירן דעם געענדערטן אָדער צוגעגעבענעם אינהאַלט אונטער CC BY-SA 4.0 אָדער אַ שפּעטערדיקער ווערסיע (אָדער, ווי אויבן דערקלערט, אַן אַנדער ליצענץ ווען די באַזונדערע פּראָיעקט־אויסגאַבע אָדער פֿונקציע פֿאָדערט זי ווי אַן אויסנאַם).
   ווען איר ענדערט אָדער לייגט צו צו סײַ וועלכע נישט־טעקסטלעכע מעדיע וואָס איר האָט באַקומען פֿון אַ פּראָיעקט־וועבזײַט, זײַט איר מסכּים צו ליצענצירן דעם געענדערטן אָדער צוגעגעבענעם אינהאַלט לויט דער ליצענץ אונטער וועלכער דאָס ווערק איז צוגעשטעלט געוואָרן.
   סײַ בײַ טעקסטלעכן אינהאַלט, סײַ בײַ נישט־טעקסטלעכע מעדיע, זײַט איר מסכּים קלאָר אָנצוגעבן אַז דאָס אָריגינעלע ווערק איז געענדערט געוואָרן. אויב איר ווידערניצט טעקסטלעכן אינהאַלט אין אַ וויקי, איז גענוג אָנצוגעבן אין דער זײַט־געשיכטע אַז איר האָט געענדערט דעם אימפּאָרטירטן טעקסט. פֿאַר יעדער קאָפּיע אָדער געענדערטער ווערסיע וואָס איר פֿאַרשפּרייט, זײַט איר מסכּים אַרײַנצונעמען אַ ליצענץ־מעלדונג וואָס זאָגט אונטער וועלכער ליצענץ דאָס ווערק ווערט אַרויסגעגעבן, צוזאַמען מיט אַ היפּערלינק אָדער URL־אַדרעס צום טעקסט פֿון דער ליצענץ, אָדער אַ קאָפּיע פֿון דער ליצענץ אַליין.

פֿאָלגן אויטאָררעכט איבער דער וועלט

אויב איר האַלט אַז אינהאַלט אויף וויקיפּעדיע פֿאַרלעצט אינטעלעקטועלע אייגנטום־רעכט, קען מען עס מעלדן צו דער וויקימעדיע־פֿונדאַציע דורך אונדזער פּראָצעס פֿאַר מעלדן אומגעזעצלעכן אינהאַלט (זעט אָפּטייל 10 אונטן).

ביטע נעמט אין אַכט אַז צוליב דער צופּאַסונג פֿון אינטערנאַציאָנאַלע אויטאָררעכט־געזעצן איינער צום אַנדערן, וועט אין אַ סך פֿאַלן זײַן מעגלעך אַרײַנצוגעבן אַ מעלדונג וועגן אַ פֿאַרלעצונג פֿון אויטאָררעכט סײַ לויט אײַער לאָקאַלן געזעץ, סײַ לויטן אַמעריקאַנער געזעץ. כּדי צו זײַן גילטיק לויטן אַמעריקאַנער געזעץ, מוז אַ מעלדונג וועגן אויטאָררעכט פֿאָלגן די אונטן אויסגערעכנטע פֿאָדערונגען פֿונעם DMCA.

אין פּאַסיקע אומשטענדן וועלן מיר אָפּשטעלן דעם צוטריט פֿון באַניצערס און קאָנטע־באַזיצער פֿון אונדזער סיסטעם און נעץ וואָס פֿאַרלעצן ווידערהאָלט אויטאָררעכט אויף אונדזערע פּראָיעקטן און סערוויסעס.

פֿאָלגן דעם DMCA

די וויקימעדיע־פֿונדאַציע וויל פֿאַרזיכערן אַז אַנדערע באַניצערס קענען ווידערניצן דעם אינהאַלט וואָס מיר באַלעבאַטעווען אָן מורא פֿון לעגאַלער פֿאַראַנטוואָרטלעכקייט, און אַז דער אינהאַלט פֿאַרלעצט נישט די אייגנטום־רעכט פֿון אַנדערע. כּדי צו זײַן יושרדיק צו אונדזערע באַניצערס און אויך צו אַנדערע שאַפֿער און אויטאָררעכט־באַזיצער, איז אונדזער פּאָליטיק צו ענטפֿערן אויף מעלדונגען וועגן באַהויפּטע פֿאַרלעצונגען וואָס פֿאָלגן די פֿאָרמעלע פֿאָדערונגען פֿונעם Digital Millennium Copyright Act („DMCA“). לויטן DMCA וועלן מיר אין פּאַסיקע אומשטענדן אָפּשטעלן דעם צוטריט פֿון באַניצערס און קאָנטע־באַזיצער פֿון אונדזער סיסטעם און נעץ וואָס פֿאַרלעצן ווידערהאָלט אויטאָררעכט אויף אונדזערע פּראָיעקטן און סערוויסעס.

מיר דערקענען אָבער אויך אַז נישט יעדע באַזײַטיקונג־פֿאָדערונג איז גילטיק אָדער געמאַכט מיט גוטע כּוונות. אין אַזעלכע פֿאַלן דערמוטיקן מיר שטאַרק באַניצערס צו שיקן קעגנמעלדונגען ווען זיי האָבן אַ פּאַסיקן יסוד צו גלייבן אַז אַ DMCA־באַזײַטיקונג־פֿאָדערונג איז אומגילטיק אָדער נישט געהעריק. פֿאַר מער אינפֿאָרמאַציע וועגן וואָס צו טאָן אויב איר האַלט אַז אַ DMCA־מעלדונג איז נישט געהעריק אַרײַנגעגעבן געוואָרן, קענט איר זיך ווענדן צום וועבזײַטל Lumen Database.

אויב איר זײַט דער באַזיצער פֿון אינהאַלט וואָס ווערט אויף איינעם פֿון די פּראָיעקטן נישט געהעריק געניצט אָן אײַער דערלויבעניש, קענט איר בעטן מען זאָל דעם אינהאַלט באַזײַטיקן דורך אַרײַנגעבן אַ מעלדונג לויטן DMCA. כּדי צו מאַכן אַזאַ בקשה, שיקט אונדז אַ בליצבריוו צו legalwikimediaorg אָדער שיקט אַ בריוו מיט געוויינטלעכער פּאָסט צו אונדזער באַשטימטן פֿאָרשטייער.

אַלטערנאַטיוו קענט איר זיך ווענדן מיט אַ בקשה צו אונדזער קהילה, וואָס באַהאַנדלט אָפֿט אויטאָררעכט־פֿראַגעס שנעלער און ווירקזאַמער ווי דער פּראָצעס באַשטימט לויטן DMCA. אין אַזאַ פֿאַל קענט איר פֿאַרעפֿנטלעכן אַ מעלדונג וואָס דערקלערט אײַערע זאָרגן וועגן אויטאָררעכט. פֿאַר אַ נישט אויסשעפּנדיקער און נישט אויטאָריטאַטיווער רשימה פֿון די באַטרעפֿנדיקע פּראָצעסן פֿאַר די פֿאַרשיידענע פּראָיעקט־אויסגאַבעס, באַזוכט די זײַט וועגן אויטאָררעכט־פּראָבלעמען. איידער איר גיט אַרײַן אַ DMCA־קלאָג, האָט איר אויך די מעגלעכקייט צו שיקן אַ בליצבריוו צו דער קהילה בײַ infowikimediaorg.

איר אַליין זײַט פֿאַראַנטוואָרטלעך פֿאַר אײַער באַניץ פֿון סײַ וועלכע וועבזײַטן אָדער רעסורסן פֿון דריטע צדדים. כאָטש די פּראָיעקטן און פּראָיעקט־וועבזײַטן אַנטהאַלטן לינקען צו וועבזײַטן און רעסורסן פֿון דריטע צדדים, שטיצן מיר זיי נישט און טראָגן נישט קיין פֿאַראַנטוואָרטלעכקייט אָדער לעגאַלע חבֿות פֿאַר זייער צוטריטלעכקייט, גענויקייט אָדער דעם פֿאַרבונדענעם אינהאַלט, פּראָדוקטן אָדער סערוויסעס (אַרײַנגערעכנט, אָן באַגרענעצונג, ווירוסן אָדער אַנדערע שטערנדיקע פֿונקציעס). מיר האָבן אויך נישט קיין פֿאַרפֿליכטונג צו קאָנטראָלירן אַזאַ דריט־צדדיקן אינהאַלט.

די קהילה האָט דעם הויפּטתּפקיד אין שאַפֿן און דורכפֿירן פּאָליטיקן וואָס גילטן פֿאַר די פֿאַרשיידענע פּראָיעקט־אויסגאַבעס. בײַ דער וויקימעדיע־פֿונדאַציע מישן מיר זיך זעלטן אַרײַן אין די קהילה־באַשלוסן וועגן פּאָליטיק און איר דורכפֿירונג.

מע קען אונדז מעלדן וועגן אומגעזעצלעכן אינהאַלט, אָדער אינהאַלט וואָס פֿאַרלעצט אונדזערע באַניץ־תּנאָים (אַרײַנגערעכנט אַלע פּאָליטיקן און אַנדערע דאָקומענטן אַרײַנגענומען דורך דערמאָנונג) פֿאַר אַנדערע סיבות, דורך זיך דירעקט פֿאַרבינדן מיט אונדז. איר קענט אָבער געוויינטלעך שיקן אַ בקשה דירעקט צו דער פּראָיעקט־קהילה: דאָס קען זײַן מער עפֿיציענט און איז מער אין איינקלאַנג מיטן ציל פֿון אונדזערע פּראָיעקטן צו געבן דער באַניצער־קהילה די מעגלעכקייט אַליין צו האַנדלען. ביטע נעמט אין אַכט אַז דער דאָזיקער פֿאַרבינדונג־אופֿן דינט ווי דער מעכאַניזם פֿון דער פֿונדאַציע פֿאַר באַהאַנדלען און אויסגלײַכן טענות אין אַלע יוריסדיקציעס וואָס פֿאָדערן אַזאַ מעכאַניזם. טענות אַרײַנגעגעבן דורך דעם קאָנטאַקט וועלן ווערן איבערגעקוקט אין איינקלאַנג מיט די אָנווענדלעכע לעגאַלע פֿאָדערונגען.

יעדער פּראָיעקט שטעלט געוויינטלעך צו „הילף“־ אָדער „פֿאַרבינדונג“־זײַטן מיט ווײַטערדיקע אנווײַזונגען, אָדער באַזונדערע מכשירים פֿאַר מעלדן פּראָבלעמען. אַלטערנאַטיוו — אויב איר זײַט נישט זיכער — קענט איר בעטן קהילה־מיטגלידער פֿאַר הילף דורך שיקן אַ בליצבריוו צו infowikimediaorg אָדער צו אַן אַדרעס פֿאַר אַ באַזונדערער שפּראַך פֿון דער זײַט פֿון דער פֿרײַוויליקער ענטפֿער־מאַנשאַפֿט. ביטע נעמט אין אַכט אַז די בריווקאַסטנס ווערן באַהאַנדלט פֿון באַניצערס פֿון די פּראָיעקטן, נישט פֿון דער פֿונדאַציע. דערפֿאַר זאָל מען זיי נישט דראָען אָדער צו זיי שיקן לעגאַלע פֿאָדערונגען.

אויב איר ווענדט זיך צו דער פֿונדאַציע מיט אַ פּראָבלעם, וועלן מיר געוויינטלעך אויספֿאָרשן צי און ווי עקזיסטירנדיקע מעכאַניזמען אָנגעפֿירט פֿון דער קהילה קענען אים אויספֿאָרשן און, וווּ פּאַסיק, לייזן.

אין אַן אויסערגעוויינטלעכן פֿאַל קען אויפֿקומען אַ נייטיקייט, אָדער די קהילה קען אונדז בעטן, צו באַהאַנדלען אַ ספּעציעל פּראָבלעמאַטישן באַניצער אָדער ספּעציעל פּראָבלעמאַטישן אינהאַלט צוליב אַ באַדײַטיקער שטערונג פֿונעם פּראָיעקט אָדער אַ געפֿערלעכן אויפֿפֿיר. אין אַזעלכע פֿאַלן רעזערווירן מיר זיך דאָס רעכט, לויט אונדזער אייגענעם שיקול־דעת אַליין (אָדער ווען דאָס געזעץ צווינגט אונדז דערצו), צו:

• אויספֿאָרשן אײַער באַניץ פֿון די פּראָיעקטן אָדער אונדזערע סערוויסעס (א) כּדי צו באַשטימען צי עס איז פֿאָרגעקומען אַ פֿאַרלעצונג פֿון די דאָזיקע באַניץ־תּנאָים, אַ פּאָליטיק פֿון דער פּראָיעקט־אויסגאַבע אָדער אַן אַנדער אָנווענדלעכן געזעץ אָדער פּאָליטיק, אָדער (ב) כּדי זיך צו האַלטן בײַ סײַ וועלכן אָנווענדלעכן געזעץ, לעגאַלן פּראָצעס אָדער פּאַסיקער רעגירונגס־בקשה;
• דערקענען, פֿאַרמײַדן אָדער אַנדערש באַהאַנדלען שווינדל, פֿאַלשע אָדער נישט באַשטעטיקבאַרע אינפֿאָרמאַציע, זיכערהייט־ אָדער טעכנישע פּראָבלעמען, אָדער ענטפֿערן אויף בקשות פֿאַר באַניצער־הילף;
• אָפּזאָגן, צוריקדרייען, אויסשליסן אָדער באַגרענעצן צוטריט צו בײַטראָגן פֿון סײַ וועלכן באַניצער וואָס פֿאַרלעצט די דאָזיקע באַניץ־תּנאָים;
• פֿאַרווערן אַ באַניצער צו רעדאַקטירן אָדער בײַטראָגן, אָדער בלאָקירן זײַן קאָנטע אָדער צוטריט פֿאַר אַקציעס וואָס פֿאַרלעצן די דאָזיקע באַניץ־תּנאָים, אַרײַנגערעכנט ווידערהאָלטן פֿאַרעפֿנטלעכן אומגעזעצלעכן מאַטעריאַל לויטן אָנווענדלעכן געזעץ אין איינקלאַנג מיט מענטשנרעכט־פּרינציפּן;
• אונטערנעמען לעגאַלע אַקציעס קעגן באַניצערס וואָס פֿאַרלעצן די דאָזיקע באַניץ־תּנאָים (אַרײַנגערעכנט מעלדונגען צו געזעץ־דורכפֿירונג־אויטאָריטעטן); און
• אַנדערש פֿאַרוואַלטן די פּראָיעקט־וועבזײַטן אויף אַן אופֿן באַשטימט צו דערלײַכטערן זייער געהעריקן פֿונקציאָנירן און באַשיצן די רעכט, דאָס אייגנטום און די זיכערהייט פֿון אונדז, אונדזערע באַניצערס, ליצענץ־געבער, פּאַרטנערס און דעם עולם.

די דאָזיקע קאָנטראָל־אַקטיוויטעטן פֿון דער פֿונדאַציע קענען זיך שטיצן אויף אינפֿאָרמאַציע פֿון ווייכוואַרג אָדער ווערן דורכגעפֿירט דורך ווייכוואַרג (ווי שוץ קעגן פֿאַרפֿלייצן מיט דאַטן־פֿאַרקער, „Denial of Service“). אין די פֿאַלן איז געוויינטלעך מעגלעך אַ מענטשלעכע איבערקוקונג, אויף בקשה.

צוליב די אינטערעסן פֿון אונדזערע באַניצערס און די פּראָיעקטן, איז אין דעם עקסטרעמען פֿאַל ווען עמעצנס קאָנטע אָדער צוטריט איז בלאָקירט געוואָרן לויט דעם דאָזיקן אָפּטייל, אים פֿאַרווערט צו שאַפֿן אָדער נוצן אַן אַנדער קאָנטע אויפֿן זעלבן פּראָיעקט אָדער פּרוּוון צו באַקומען צוטריט צו אים, סײַדן מיר געבן אַ בפֿירושע דערלויבעניש. אָן באַגרענעצן די באַפֿוגעניש פֿון דער קהילה, וועט די פֿונדאַציע אַליין נישט פֿאַרווערן אַ באַניצער צו רעדאַקטירן אָדער בײַטראָגן, אָדער בלאָקירן זײַן קאָנטע אָדער צוטריט, בלויז צוליב קריטיק געמאַכט מיט גוטע כּוונות וואָס פֿירט נישט צו אַקציעס וואָס פֿאַרלעצן אַנדערש די דאָזיקע באַניץ־תּנאָים אָדער קהילה־פּאָליטיקן.

די וויקימעדיע־קהילה און אירע מיטגלידער קענען אויך אונטערנעמען אַקציעס ווען די פּאָליטיקן פֿון דער קהילה אָדער פֿונדאַציע וואָס גילטן פֿאַר דער באַזונדערער פּראָיעקט־אויסגאַבע דערלויבן דאָס. די אַקציעס קענען אַרײַננעמען, אָבער זענען נישט באַגרענעצט צו, וואָרענען, אויספֿאָרשן, בלאָקירן אָדער פֿאַרווערן באַניצערס וואָס פֿאַרלעצן די פּאָליטיקן. איר זײַט מסכּים צו פֿאָלגן די ענדגילטיקע באַשלוסן פֿון גופים פֿאַר לייזן מחלוקתן, געשאַפֿן פֿון דער קהילה פֿאַר די באַזונדערע פּראָיעקט־אויסגאַבעס (ווי אַרביטראַציע־קאָמיטעטן); די באַשלוסן קענען אַרײַננעמען סאַנקציעס ווי באַשטימט אין דער פּאָליטיק פֿון דער באַזונדערער פּראָיעקט־אויסגאַבע.

ספּעציעל פּראָבלעמאַטישע באַניצערס וועמענס קאָנטעס אָדער צוטריט זענען בלאָקירט געוואָרן אויף עטלעכע פּראָיעקט־אויסגאַבעס קענען באַקומען אַ פֿאַרווער אויף אַלע פּראָיעקט־אויסגאַבעס, לויט דער פּאָליטיק וועגן גלאָבאַלע פֿאַרווערן. אַנדערש ווי באַשלוסן פֿון דער פֿאַרוואַלטונג אָדער די דאָזיקע באַניץ־תּנאָים, קענען פּאָליטיקן געשאַפֿן פֿון דער קהילה, וואָס קענען גילטן פֿאַר איין פּראָיעקט־אויסגאַבע אָדער פֿאַר עטלעכע (ווי די פּאָליטיק וועגן גלאָבאַלע פֿאַרווערן), ווערן געענדערט פֿון דער באַטרעפֿנדיקער קהילה לויט אירע אייגענע פּראָצעדורן.

דאָס בלאָקירן אַ קאָנטע אָדער צוטריט, אָדער פֿאַרווערן אַ באַניצער לויט דער דאָזיקער הוראה, מוז זײַן אין איינקלאַנג מיט אָפּטייל 13 פֿון די דאָזיקע באַניץ־תּנאָים.

אויב איר האַלט אַז מיר האָבן נישט באַפֿרידיקנדיק באַהאַנדלט אַ מעלדונג וועגן פּראָבלעמאַטישן אינהאַלט, אָדער אויב די פֿונדאַציע האָט דורכגעפֿירט אַ קאָנטראָל־אַקציע קעגן אײַך וואָס איר ווילט אָנפֿעכטן, קענט איר אפֿשר אַרײַנגעבן אַן אַפּעל. נאָך אינפֿאָרמאַציע וועגן אַפּעל־וועגן קען אײַך אויך ווערן דערקלערט דעמאָלט אָדער אויף פּראָיעקט־ספּעציפֿישע הילף־זײַטן.

מיר רעזערווירן זיך דאָס רעכט אָפּצושטעלן (צײַטווײַליק אָדער שטענדיק) אונדזער באַהאַנדלונג פֿון מעלדונגען אָדער אַנדער קאָרעספּאָנדענץ פֿון באַניצערס אָדער דריטע צדדים — צי וועגן באַהויפּט אומגעזעצלעכן אָדער אַנדערש פּראָבלעמאַטישן אינהאַלט אָדער אויפֿפֿיר, צי בקשות פֿאַר אַפּעלן קעגן קאָנטראָל־אַקציעס — אויב די קאָרעספּאָנדענץ איז געמאַכט געוואָרן מיט שלעכטע כּוונות, איז ווידערהאָלנדיק, אומבאַגרינדעט און/אָדער זידלענדיק. אין פּאַסיקע אומשטענדן קען אײַער בליצפּאָסט־אַדרעס אַפֿילו ווערן בלאָקירט אין אונדזערע בליצפּאָסט־סיסטעמען. אויב איר ווילט ווײַטער קאָרעספּאָנדירן מיט אונדז בשעת דער בלאָקירונג, וועט איר דאַן דאַרפֿן זיך פֿאַרבינדן מיט אונדז אויף אונדזער פּאָסט־אַדרעס. אין ווייניקער ערנסטע פֿאַלן (למשל, ביז דרײַ העפֿלעכע בליצבריוו וועגן איין אָדער מער אומבאַגרינדעטע קלאָגן) וועט דאָס מסתּמא זײַן צײַטווײַליק. אָפֿטערע אָדער מער זידלענדיקע קאָמוניקאַציעס וועלן מער מסתּמא פֿירן צו שטענדיקע מיטלען. מענטשן אין דעם אייראָפּעיִשן פֿאַרבאַנד קענען געפֿינען נאָך אינפֿאָרמאַציע אויף אונדזער זײַט וועגן פֿאָלגן די פֿאָדערונגען פֿונעם אייראָפּעיִשן פֿאַרבאַנד און מעלדן פּראָבלעמען.

די פֿאַרוואַלטונג פֿון דער וויקימעדיע־פֿונדאַציע פֿאַרעפֿנטלעכט אָפֿיציעלע פּאָליטיקן פֿון צײַט צו צײַט. טייל פֿון די פּאָליטיקן קענען זײַן מחייבֿ פֿאַר אַ באַזונדערן פּראָיעקט אָדער פּראָיעקט־אויסגאַבע. ווען דאָס איז אַזוי, זײַט איר מסכּים זיך צו האַלטן בײַ זיי ווי אָנווענדלעך.

מיר שטעלן צו אַ זאַמלונג API־צובינדן, אַרײַנגערעכנט דאָקומענטאַציע און פֿאַרבונדענע מכשירים, כּדי צו דערמעגלעכן באַניצערס צו בויען פּראָדוקטן וואָס ברענגען פֿאָרויס פֿרײַע קענטעניש. דורכן נוצן אונדזערע API־צובינדן זײַט איר מסכּים צו פֿאָלגן אַלע אָנווענדלעכע פּאָליטיקן וועגן דעם באַניץ פֿון די API־צובינדן. די פּאָליטיקן נעמען אַרײַן, אָבער זענען נישט באַגרענעצט צו, דער User-Agent־פּאָליטיק, דער ראָבאָט־פּאָליטיק און די API:העפֿלעכקייט־כּללים (צוזאַמען „API־דאָקומענטאַציע“), וואָס ווערן אַרײַנגענומען אין די דאָזיקע באַניץ־תּנאָים דורך דערמאָנונג.

כאָטש מיר האָפֿן אַז איר וועט בלײַבן און ווײַטער בײַטראָגן צו די פּראָיעקטן, קענט איר יעדעס מאָל אויפֿהערן צו נוצן אונדזערע סערוויסעס. אין געוויסע (האָפֿנטלעך זעלטענע) אומשטענדן קען זײַן נייטיק אַז מיר, די וויקימעדיע־קהילה אָדער אירע מיטגלידער (ווי באַשריבן אין אָפּטייל 10) זאָלן אָפּשטעלן אַ טייל אָדער אַלע אונדזערע סערוויסעס, אָפּשטעלן די דאָזיקע באַניץ־תּנאָים, בלאָקירן אײַער קאָנטע אָדער צוטריט, אָדער אײַך פֿאַרווערן ווי אַ באַניצער. אויב אײַער קאָנטע אָדער צוטריט ווערט בלאָקירט אָדער אַנדערש אָפּגעשטעלט פֿאַר וועלכער עס איז סיבה, וועלן אײַערע עפֿנטלעכע בײַטראָגן און אַ רעקאָרד פֿון אײַערע אַקטיוויטעטן אויף אָדער אין שײַכות מיט די פּראָיעקטן (אַרײַנגערעכנט סײַ וועלכע קאָרעספּאָנדענץ וואָס איר האָט אונדז געשיקט) בלײַבן אומבאַווירקט (אונטער די אָנווענדלעכע פּאָליטיקן). איר קענט ווײַטער האָבן צוטריט צו אונדזערע עפֿנטלעכע זײַטן נאָר כּדי צו לייענען דעם עפֿנטלעך צוטריטלעכן אינהאַלט אויף די פּראָיעקטן. אין אַזעלכע אומשטענדן קענט איר אָבער אפֿשר נישט באַקומען צוטריט צו אײַער קאָנטע אָדער אײַנשטעלונגען. אָבער, אומאָפּהענגיק פֿון סײַ וועלכער אַנדער הוראה אין די דאָזיקע באַניץ־תּנאָים, רעזערווירן מיר זיך דאָס רעכט אָפּצושטעלן די סערוויסעס צײַטווײַליק אָדער שטענדיק אין יעדער צײַט, מיט אָדער אָן אַ סיבה, און מיט אָדער אָן אַ מעלדונג. אַפֿילו נאָכדעם ווי אײַער באַניץ און אָנטייל ווערן פֿאַרווערט, בלאָקירט אָדער אַנדערש אָפּגעשטעלט, בלײַבן די דאָזיקע באַניץ־תּנאָים אין קראַפֿט בנוגע די באַטרעפֿנדיקע הוראות, אַרײַנגערעכנט אָפּטיילן 1, 3, 4, 6, 7, 9–16 און 18.

פּונקט ווי די בײַשטײַערונג פֿון דער וויקימעדיע־קהילה איז נייטיק פֿאַרן וווּקס און אויפֿהאַלטן די פּראָיעקטן, גלייבן מיר אַז די בײַשטײַערונג פֿון דער קהילה איז נייטיק כּדי די דאָזיקע באַניץ־תּנאָים זאָלן געהעריק דינען אונדזערע באַניצערס. זי איז אויך נייטיק פֿאַר אַ יושרדיקן קאָנטראַקט. דערפֿאַר וועלן מיר פֿאָרלייגן די דאָזיקע באַניץ־תּנאָים, און אויך אַלע וועזנטלעכע צוקונפֿטיקע רעוויזיעס פֿון זיי, פֿאַר באַמערקונגען פֿון דער קהילה כאָטש דרײַסיק (30) טעג איידער דער באַמערקונג־פּעריאָד ענדיקט זיך. אויב אַ צוקונפֿטיקע פֿאָרגעלייגטע רעוויזיע איז וועזנטלעך, וועלן מיר געבן נאָך 30 טעג פֿאַר באַמערקונגען נאָכן פֿאַרעפֿנטלעכן אַ תּרגום פֿון דער פֿאָרגעלייגטער רעוויזיע אויף כאָטש דרײַ שפּראַכן (אויסגעקליבן לויט אונדזער שיקול־דעת). די קהילה וועט ווערן דערמוטיקט צו איבערזעצן די פֿאָרגעלייגטע רעוויזיע אויף אַנדערע שפּראַכן ווי פּאַסיק. פֿאַר ענדערונגען צוליב לעגאַלע אָדער אַדמיניסטראַטיווע סיבות, כּדי צו פֿאַרריכטן אַ נישט גענויע דערקלערונג, אָדער אין ענטפֿער אויף באַמערקונגען פֿון דער קהילה, וועלן מיר געבן אַ מעלדונג כאָטש דרײַ (3) טעג פֿריִער.

ווײַל עס קען זײַן נייטיק צו ענדערן די דאָזיקע באַניץ־תּנאָים פֿון צײַט צו צײַט, וועלן מיר מעלדן וועגן אַזעלכע ענדערונגען און דער געלעגנהייט צו געבן באַמערקונגען דורך די פּראָיעקט־וועבזײַטן און דורך אַן אָנזאָג אויף WikimediaAnnounce-l. מיר בעטן אָבער אַז איר זאָלט פֿון צײַט צו צײַט איבערלייענען די סאַמע נײַסטע ווערסיע פֿון די דאָזיקע באַניץ־תּנאָים. אויב איר ניצט ווײַטער אונדזערע סערוויסעס נאָכדעם ווי די נײַע באַניץ־תּנאָים ווערן אָפֿיציעל נאָך דער מעלדונג־ און איבערקוקונג־תּקופֿה, הייסט דאָס אַז איר נעמט אָן די דאָזיקע באַניץ־תּנאָים. כּדי צו באַשיצן די וויקימעדיע־פֿונדאַציע און אַנדערע באַניצערס ווי איר, טאָר איר נישט נוצן אונדזערע סערוויסעס אויב איר זײַט נישט מסכּים מיט אונדזערע באַניץ־תּנאָים.

די דאָזיקע באַניץ־תּנאָים שאַפֿן נישט קיין באַציִונג פֿון אָנשטעלונג, פֿאָרשטייערשאַפֿט, שותּפֿות, געמיינזאַמער קאָנטראָל אָדער אַ געמיינזאַמער אונטערנעמונג צווישן אײַך און אונדז, דער וויקימעדיע־פֿונדאַציע. פֿאַר די צוועקן פֿון די געזעצן פֿונעם אייראָפּעיִשן עקאָנאָמישן ראַיאָן, פֿונעם פֿאַראייניקטן קעניגרײַך אָדער אַנדערע געזעצן מיט אַן ענלעכן באַגריף, האַנדלט איר נישט „אונטער דער אויטאָריטעט פֿון“ דער פֿונדאַציע ווען איר ניצט די סערוויסעס. אויב איר האָט נישט אונטערגעשריבן אַ באַזונדערן הסכּם מיט אונדז, זענען די דאָזיקע באַניץ־תּנאָים דער גאַנצער הסכּם צווישן אײַך און אונדז. אויב עס איז דאָ אַ סתּירה צווישן די דאָזיקע באַניץ־תּנאָים און אַ שריפֿטלעכן, אונטערגעשריבענעם הסכּם צווישן אײַך און אונדז, וועט דער אונטערגעשריבענער הסכּם האָבן דאָס פֿאָררעכט.

איר זײַט מסכּים אַז מיר קענען אײַך געבן מעלדונגען, אַרײַנגערעכנט וועגן ענדערונגען אין די באַניץ־תּנאָים, דורך בליצפּאָסט, געוויינטלעכער פּאָסט אָדער פֿאַרעפֿנטלעכונגען אויף די פּראָיעקטן אָדער פּראָיעקט־וועבזײַטן.

אויב מיר אין וועלכע עס זענען אומשטענדן ווענדן נישט אָן אָדער פֿירן נישט דורך סײַ וועלכע הוראה פֿון די דאָזיקע באַניץ־תּנאָים, איז דאָס נישט קיין פֿאַרזיכט אויף דער הוראה.

איר פֿאַרשטייט אַז, סײַדן מיר האָבן שריפֿטלעך מסכּים געווען אַנדערש, האָט איר נישט קיין דערוואַרטונג פֿון פֿאַרגיטיקונג פֿאַר סײַ וועלכער אַקטיוויטעט, בײַטראָג אָדער געדאַנק וואָס איר גיט אונדז, דער קהילה אָדער די פּראָיעקטן אָדער פּראָיעקט־אויסגאַבעס.

טראָץ סײַ וועלכער קעגנזעצלעכער הוראה אין די דאָזיקע באַניץ־תּנאָים, זענען מיר (די וויקימעדיע־פֿונדאַציע) און איר מסכּים נישט צו ענדערן די אָנווענדלעכע תּנאָים און פֿאָדערונגען פֿון סײַ וועלכער פֿרײַער ליצענץ געניצט אויף די פּראָיעקטן אָדער פּראָיעקט־אויסגאַבעס, ווען די דאָזיקע באַניץ־תּנאָים דערלויבן אַזאַ פֿרײַע ליצענץ.

די דאָזיקע באַניץ־תּנאָים זענען געשריבן געוואָרן אויף אַמעריקאַנער ענגליש. כאָטש מיר האָפֿן אַז די תּרגומים פֿון די דאָזיקע באַניץ־תּנאָים זענען גענוי, האָט בײַ סײַ וועלכן חילוק אין באַדײַט צווישן דער אָריגינעלער ענגלישער ווערסיע און אַ תּרגום, די אָריגינעלע ענגלישע ווערסיע דאָס פֿאָררעכט.

אויב סײַ וועלכע הוראה אָדער טייל פֿון אַ הוראה פֿון די דאָזיקע באַניץ־תּנאָים ווערט געפֿונען אומגעזעצלעך, בטל אָדער נישט דורכצווינגלעך, ווערט די הוראה אָדער דער טייל באַטראַכט ווי אָפּטיילבאַר פֿון די דאָזיקע באַניץ־תּנאָים און וועט דורכגעפֿירט ווערן אין דער מאַקסימאַלער דערלויבטער מאָס. אַלע אַנדערע הוראות פֿון די דאָזיקע באַניץ־תּנאָים בלײַבן אין פֿולער קראַפֿט און ווירקונג.

מיר שאַצן אַז איר האָט גענומען די צײַט צו לייענען די דאָזיקע באַניץ־תּנאָים, און מיר זענען זייער צופֿרידן אַז איר טראָגט בײַ צו די פּראָיעקטן און ניצט אונדזערע סערוויסעס. דורך אײַערע בײַטראָגן העלפֿט איר בויען עפּעס טאַקע גרויס — נישט בלויז אַ וויכטיקע זאַמלונג פֿון געמיינזאַם רעדאַקטירטע רעפֿערענץ־פּראָיעקטן, וואָס גיט בילדונג און אינפֿאָרמאַציע צו מיליאָנען מענטשן וואָס וואָלטן אפֿשר אַנדערש נישט געהאַט צוטריט דערצו, נאָר אויך אַ לעבעדיקע קהילה פֿון ענלעך־טראַכטנדיקע און אַקטיווע מיטאַרבעטער, קאָנצענטרירט אויף אַ זייער איידעלן ציל.

די דאָזיקע באַניץ־תּנאָים זענען אַרײַן אין קראַפֿט דעם 7טן יוני 2023. פֿריִערדיקע ווערסיעס פֿון די תּנאָים:

• באַניץ־תּנאָים (2014–2023): אין קראַפֿט פֿון דעם 16טן יוני 2014 ביז דעם 7טן יוני 2023
• באַניץ־תּנאָים (2012–2014): אין קראַפֿט פֿון דעם 24סטן מײַ 2012 ביז דעם 16טן יוני 2014
• באַניץ־תּנאָים (2009): אין קראַפֿט פֿון 2009 ביז דעם 24סטן מײַ 2012