Tuisblad

Die T20I-wêreldbeker 2016 (Engels: 2016 ICC Men’s T20 World Cup) is van 8 Maart tot 3 April 2016 in Indië beslis. Dit was die sesde T20I-wêreldbekertoernooi in T20I-krieket wat deur die Internasionale Krieketraad (IKR) aangebied word en die eerste in Indië. Destyds is dié toernooi Wêreldtwintig20 2016 (Engels: 2016 ICC World Twenty20; Hindi: २०१६ आईसीसी विश्व ट्वेन्टी २०) genoem, maar sedert die 2021-toernooi staan dit as T20I-wêreldbeker bekend. Die manstoernooi is gelyktydig met die vrouetoernooi gehou en beide die halfeindrondte en die eindstryde van albei toernooie is op dieselfde dag op dieselfde stadions beslis. Ná die 2012-toernooi in Sri Lanka en die 2014-toernooi in Bangladesj was dit die derde agtereenvolgende T20I-wêreldbekertoernooi in ’n Asiatiese land.

Die toernooi se formaat van 2014 het onveranderd gebly en 16 nasionale krieketspanne het aan die T20I-wêreldbeker 2016 deelgeneem: Die destydse tien toetskrieketlande (Australië, Bangladesj, Engeland, Indië, Nieu-Seeland, Pakistan, Sri Lanka, Suid-Afrika, Wes-Indië en Zimbabwe), saam met die wenners van die kwalifisering (Afghanistan, Hongkong, Ierland, Nederland, Oman en Skotland). Oman het vir die eerste keer vir ’n T20I-wêreldbekertoernooi gekwalifiseer en daarmee vir sy eerste vername internasionale kriekettoernooi, nadat hulle Namibië in die uitspeelwedstryd verslaan het.

Tydens die T20I-wêreldbeker 2016 is 35 wedstryde gespeel, waaronder twaalf in die eerste rondte, 20 in die Super Tien, en drie in die uitklopfase, insluitende die eindstryd. Die agt beste spanne op die IKR se T20I-ranglys soos op 30 April 2014 het aan die Super Tien deelgeneem, terwyl die laer geplaasde spanne saam met die kwalifiserende spanne in die eerste rondte gespeel het. Die agt spanne wat aan die eerste rondte deelgeneem het, is in twee groepe van vier spanne elk verdeel, waarvan elke span een keer teen al die ander spanne in die groep gespeel het. Die beste span van elke groep het hierna vir die Super Tien gekwalifiseer. In die Super Tien is die spanne in twee groepe van vyf spanne elk verdeel, waarvan die twee beste spanne tot die halfeindrondte gevorder en die wenners mekaar in die eindstryd ontmoet het.

Engeland, Indië, Nieu-Seeland en Wes-Indië het vir die halfeindrondte gekwalifiseer. Engeland het Nieu-Seeland en Wes-Indië vir die gasheer Indië geklop, waardeur dit die eerste eindstryd tussen twee voormalige kampioene was en ná die 2010-eindstryd die tweede sonder ’n Suid-Asiatiese span. Wes-Indië het Engeland in die eindstryd op Eden Gardens in Kolkata met vier paaltjies verslaan en sodoende die eerste span geword om twee T20I-wêreldbekertitels in te palm. Daarbenewens het Wes-Indië die eerste krieketland geword wat die T20I-wêreldbeker vir beide mans en vroue op dieselfde dag gewen het, nadat die vrouespan onmiddellik voor die mansspan die verdedigende wêreldkampioen Australië geklop het. Beide die verdedigende wêreldkampioen Sri Lanka en Suid-Afrika is in die Super Tien uitgeskakel – die Proteas ná naelskraapse nederlae teen albei latere finaliste –, terwyl Zimbabwe nie die Super Tien gehaal het nie.

...lees verder

• Twee maande ná die Afrikanasiesbeker 2025-eindstryd, wat oorspronklik deur Senegal gewen is, het die CAF die titel aan Marokko toegeken.
• Frankryk wen tydens die Sesnasies-toernooi in 2026 hul 28ste titel algeheel, terwyl Portugal tydens die Europese Rugbykampioenskap hul tweede titel inpalm.
• António José Seguro is ingehuldig as nuwe president van Portugal en José Antonio Kast as nuwe president van Chili.
• Mojtaba Chamenei volg sy pa Ali Chamenei as nuwe opperleier van die Islamitiese Republiek Iran op.
• In die eindstryd van die T20I-wêreldbeker 2026 op die Narendra Modi-stadion in Ahmedabad verslaan die medegasheer en verdedigende wêreldkampioen Indië vir Nieu-Seeland met 96 lopies en palm sodoende sy derde T20I-wêreldbekertitel in. Engeland en Suid-Afrika was die ander twee semi-finaliste.

... dat 'n hartvorm (♥) deur 'n wiskundige funksie geteken kan word? Die funksie staan bekend as 'n kardioïed en kan eenvoudig gedefinieer word in poolkoördinate.

... dat u kan sien watter artikels na 'n spesifieke een toe skakel en aanstuur? Onder "gereedskap" (links) is "Skakels hierheen" beskikbaar wat hierdie inligting verskaf. Dit werk selfs vir artikels wat nog nie bestaan nie.

... dat Keulen in Duitsland naas die Franse stad Bordeaux in die 13de eeu die grootste uitvoerhawe vir wyn was? Engeland was een van die vernaamste bestemmings. Vandag is die stad beter bekend vir sy bier, Kölsch, wat ook die naam van die plaaslike dialek is.

... dat die Namibiër Rudie van Vuuren die eerste (en enigste) man is wat in dieselfde jaar in twee sportsoorte, krieket en rugby, aan 'n wêreldbekertoernooi deelgeneem het? Hy het sy land tydens beide die Krieketwêreldbeker 2003 en die Rugbywêreldbeker 2003 verteenwoordig.

... dat byna die hele Kaapse Skiereiland deel is van die Tafelberg- Nasionale Park? Dié natuurreservaat is in 1998 gestig en beslaan die Tafelberg-bergreeks.

1 April: Aprilgekkedag

• 527 – Die Bisantynse keiser Justinus I benoem Justinianus I as medeheerser en opvolger.
• 1826 – Die binnebrandmotor word deur Samuel Morey gepatenteer.
• 1945 – Tweede Wêreldoorlog: Die Slag van Okinawa, die grootste amfibiese aanval in die Stille Oseaan-oorlog, begin in Okinawa, Japan.
• 1979 – Iran word as 'n Islamitiese republiek uitgeroep, 'n teokrasie gelei deur ajatolla Roeholla Chomeini as die opperleier van Iran.
• 2009 – Albanië en Kroasië sluit by die Noord-Atlantiese Verdragsorganisasie (NAVO) aan.